Skredhaugen opnar for sesongen

Sundag 21. juni kl 16.00 inviterer me til konsert med felespelar Johanna Mjeldheim og opning av sommarens to kunstutstillingar. Det vert kafe med servering av kaffi og kaker.

Under opningsprogrammet vert det konsert med felespelar Johanna Mjeldheim. Ho er Ullensvang kommune sin distriktsmusikar og kulturskulelærar med hardingfele som instrument ved kultuskulen. Ho har utdanning innan folkemusikk frå Høgskulen i Telemark og Ole Bull Akademiet, og har spesialisert seg i hardingfeletradisjonen frå Hardanger.

Utstillingar

I Nilsastova opnar utstillinga Spor i tid av Maren Sofie Strømme. Ho har malt i meir enn 35 år, og har hatt ei rekkje utstillingar i Noreg. Ho har deltatt ved kunstfestivalen Ljosanótt på Island, seinast i september 2024 og vore gjesteutstillar i Art67 Galleri Reykjavik 2023. Som medie nyttar ho akryl, akrylmåling og akryl ink, samt ulike typar tekstur. Ho nyttar ulike teknikkar for å oppnå kontrastar mellom fargar, tekstur og patina. Dybde vert skapt med transparente nyansar lag på lag. Kunstnaren er opptatt av å fanga årstidenes stemning med interessante kontrastar og fargespel, lys og stemning. Kunstnaren har alltid vore fascinert av korleis årstidene og vær set sitt preg på naturen og gamle historiske bygg, og prøver å overføra dette på lerretet for å få fram eit utvaska og elda preg, og gje måleria eit interessant uttrykk.I

Glasbua opnar utstillinga til Kunstnarkollektivet BEE Hardanger. Felleskapen vart stifta 19. mars 2021 av Britt-Helen Stuholm, Eli T Utne Lillevik og Eldbjørg Stenberg. Slik kom namnet BEE til, då dei står for forbokstavane til stiftarane sine initialar. Foreininga er ein møteplass for folk med ulik kunst- og kulturinteresse, og er eit lavterskeltilbod med møteverksemd, ulike kurs innanfor kunst og kultur, ekskursjonar for medlemane, samt utstillingar i lokalområdet. Arbeidsområda er mix media som akryl, akvarell, oljemåling, tekstilkunst, foto, glasmåling, teikning, digital kunst og trearbeid.