Arrangement frå denne arrangøren

Hardanger folkemuseum har rike samlingar av tradisjonelle tekstilar, klede som seinare vart utgangspunkt for hardangerbunaden. I utstillinga «opplut og belte» har me leita fram nesten alt me har av belte, opplutar og sjonaleister. Utstillinga er ei oppfylging av 1000 bringklutar. Ho opnar 22. mai 2021 og skulle stå til 28. oktober 2022. Utstillingsperioden er sidan forlenga til 5. mars 2023.
Den tradisjonelle draktsikken i Hardanger har røter tilbake til 1600-talet og renessansen. På den tida utvikla mange områder i Noreg særeigen draktskikk som skilte seg frå korleis folk kledde seg i andre bygder. Draktskikken var prega av stor variasjon innan faste rammer. Me ynskjer å syna fram breidda innan dei ulike plaggtypane, med all den variasjon og kreativitet det var rom for.

Opplut
I deler av Hardanger kallar ein livet til kvinnedrakta for opplut/upplut, altså den delen som er øvst. Andre stader vert dette plagget kalla liv eller vest. Syr ein oppluten fast til stakken får ein det som på fagspråket vert kalla «den eldre livkjolen», eit renessanseplagg der opplut og stakk skulle vera i ulik farge og gjerne i ulik stoffkvalitet. Stakkane var svarte eller blå, og oppluten ofte raud eller andre fargar som sto i kontrast til stakken. Oppluten var kanta med band. I utstillinga synar me gamle, rettskorne opplutar, og synar korleis plagget endra seg gjennom århundra. Her er om lag 100 opplutar i ulike fargar og stoffkvalitetar i klede, damask, kalemank, silke og fløyel.

Belte
Kring livet hadde ein belte. Desse finst i eit mangfald av teknikkar, alt frå krossting til smøyg, ulike vevde belte, og perlebelte som er sydd, tredd eller vevd. Motiva er som oftast geometriske figurar som kross, åttebladroser og rombeformer. Nokre belte har fangband, andre ikkje. I utstillinga har me avgrensa til belte i tekstile teknikkar, så sylvbelta og stølebelta kjem i ein anna utstilling seinare. Sjølv om motiva liknar dei som er nytta på bringklutar var det ikkje vanleg å ha same mønster på bringklut og belte.

Sjonaleister
Kvite sokkar med fargerik kant kring ankelen vart nytta av både kvinner, menn og barn. Desse sokkane er strikka i tvebandstrikk, med svært tynne pinnar.

Høyrt om Hvileåret – hvile, vekst og aktivisme?
Dette er eit 18-månadars prosjekt knytt til Storeteigen bygdetun. Bak prosjektet står kunstnaren Amber Ablett og gjennom prosjekt-perioden vil du få høve til å oppleva lydverk, delta på workshop og høyra samtalar med inviterte gjester.

Prosjektet vil utforska kva me kan læra om kvila si rolle som verktøy for vekst ved å sjå til tradisjonelle jordbruksteknikkar.
Prosjektet samlar aktivistar, allierte og den breiare offentlegheita for å tenka saman om kvile som ein aktiv tilstand.

Hvileåret er kuratert av Kunsthuset Kabuso og støtta av Norsk kulturråd

>> Sjå nettstaden til kunstnaren

Anne-Lise Stenseth viser prosjektet Av Helene (2017 – 2023) i årets første foajéutstilling i Kabuso.

Utstillinga viser filmatiske arbeid og publikasjonar som tar utgangspunkt i levetid, livsverk, omstende og opplysningar om den austerrikske filosofen og forfattarinna Helene von Druskowitz (1856 -1918).

Utstillinga opnar 28. januar og kan opplevast t.o.m. 23. april.

Støtta av Billedkunstnernes verderlagsfond, Kulturrådet og Kunstsentrene i Norge – Regionale prosjektmidler

Årets første hovudutstilling i Kabuso syner verk av Rita Marhaug & Terese Longva. Dei har gjennom ei årrekkje vore opptekne av energi og ressurshandsaminga i kulturen vår og søkt å gje dette poetiske, visuelle uttrykk.

I utstillinga Røynd og kjensle på Kabuso viser dei fram engasjementet sitt og nokre av dei mange paradoksa den einskilde medborgar møter i kvardagen og den uendelege rekkja av verdival som følgjer. Begge kunstnarane nyttar kroppen som uttrykk for ambivalens og dissonans i skildringane sine av makt og avmakt.

Utstillinga er sett saman av video, fotografi, performance og installasjonar.

Støtta av Kunstsentrene i Norge – Regionale prosjektmidlar
Jugendsenteret & KUBE er medprodusent av verket Havland uten kyst

Velkomen til utstillingsopning i Kabuso laurdag 28. januar kl 14!
I utstillingssalen opnar hovudutstillinga Røynd og kjensle ved Rita Marhaug og Terese Longva. I foajéen kan du oppleva Av Helene av Anne-Lise Stenseth.

Kl 14.45: Kunstnarsamtale med dei tre kunstnarane
Filmvisning i konsertsalen kl 14.10 / 14.45 / 15.20: Veggar som kviskrar av Anne-Lise Stenseth. Varigheit: 33 min.

Open kafé med lunsjrettar og kaffimat

Les meir på kunstnarane sine nettsider:
>>> Rita Marhaug
>>> Terese Longva
>>> Anne-Lise Stenseth

Laurdag 28. januar kl 21 byr Kabuso inn til ein finfin kveld i musikalt lag med Marthe Valle

Marthe Valle er ein Bergens-basert artist og låtskrivar, opprinneleg frå Harstad. Med si unike stemme og jordnære tekstar om universelle spørsmå og utfordringar, har ho sidan starteni 2004 fått eit trofast publikum. Ho har så langt hatt ei mangefasettert karriere, med utgjevingar på både norsk og engelsk, og som bidragsytar på mange ulike prosjekt og innspelingar.
Valle er også ein ein samfunnsengasjert artist som ofte brukar musikken til å formidla sitt engasjement, både gjennom tekstar og samarbeid med organisasjonar som Norsk folkehjelp, Kirken bymisjon og Dråpen i havet.

Med debutalbumet Bag of Candy (2005) vann ho sin første Spellemannspris, og følgde opp med Foverver Candid i 2008. Med albumet Fann fram i 2014 gjekk Valle over til å synga på dialekt. Både dette albumet og oppfølgaren Alt kan ikke sies (2017) gav henne brei radiostøtte med fleire A-lista låtar på NRK P1.

RO/URO frå 2018 var eit konseptalbum som opphavleg vart skrive og framført som bestillingsverk for Festspillene i Nord-Norge. Tematisk utforskar det spørsmåla kring menneskets tilstand i dagens samfunn og korleis den travle livsstilen mange lever med, stadig distanserar oss frå dei viktige verdiane i forholda våre til andre menneske og den indre balansen. Frå albumet tilbakestilling har me det siste året knytt oss til singlane Pilar, Favn om og Vi lar det gå.