No kan du gå fagskule i fartøyvern

Hausten 2025 går Fagskulen Vestland i gang med fagskuleutdanning i fartøyvern. I løpet av to år skal studentane skaffa seg 60 studiepoeng og tittelen «Fagteknikar – Fartøyvern». Opplæringa skal skje ved læringsarenaen Hardanger fartøyvernsenter i Norheimsund.  

– Dette er eit nybrotsarbeid som lyfter fagfeltet til eit nytt nivå, fortel direktør ved Hardanger og Voss museum, Åsmund Kristiansen.  

Tilbodet føyer seg inn i rekkja av utdanningar som vender seg mot dei som vil læra meir om antikvarisk restaurering på ulike felt. På sikt er målet for studiet i fartøyvern å ha inntil 15 i studentar under utdanning. Det er eit etter måten lite fagfelt, så studiet går over to skuleår, med opptak annakvart år.  

Frå før har Fagskulen Vestland eit studium i bygningsvern med læringsarena hjå Hardanger fartøyvernsenter, som den gong statssekretær Sveinung Rotevatn opna i 2018. Sidan den tid har Hardanger fartøyvernsenter hausta verdifull erfaring som har kome til god nytte når dette nye tilbodet skulle byggjast opp frå grunnen.  

I tillegg bidreg Hardanger fartøyvernsenter no til å oppfylla uttalte politiske mål, både nasjonalt og regionalt. Stortingsmelding nummer 16 (2019-2020) Nye mål i kulturmiljøpolitikken slår fast at det trengs meir spesialisert fagkompetanse innan fartøyvernfeltet, og at den bør knytast til fagskulane til liks med annan handverksutdanning. Meldinga peikar i same slengen på at fartøyvernsentra vil kunne ha ei rolle i dette. Regional kulturplan for Vestland har òg mål om at ei vidareutdanning i fartøyvern skal etablerast. 

Oppbygging av studiet 

Det er planlagt tre obligatoriske vekesamlingar i semesteret der studentane får sett teorien ut i praksis gjennom konkrete oppgåver, alt frå det grunnleggjande til det meir komplekse. Gjennom studiet skal studentane vera med på å byggja eit fartøy frå grunnen av, for å læra seg konstruksjonen til minste detalj.   

– Noko av problemet for båtbyggjarane i dag, er at det er mykje restaurering og reparasjon, men svært få nybygg på dei verfta som driv med trefartøy. For mange kan dette vera eit høve, og kanskje det einaste, til å byggja eit nytt fartøy frå grunnen, fortel leiar ved Hardanger fartøyvernsenter, Sjur Tarjei Fykse. 

Mellom samlingane skal studentane arbeida med eigne praktiske og teoretiske oppgåver som vert leverte og vurderte. Opptaket til studiet vert gjort ved vurdering av realkompetanse, og er difor òg ope for dei som har erfaring, men manglar fagbrev. Studiet er aktuelt for mange fag, t.d. platearbeidar, mekanikar, smed, snikkar, tømrar – i tillegg til trebåtbyggjar. 

 

• Utviklinga av den nye utdanninga er støtta gjennom prosjektmidlar frå Vestland fylkeskommune og Riksantikvaren. 

• Søknadsfristen vert 15. Mai. 

• Lenkje til søknadside: https://www.fagskulen.no/utdanning/bygg-og-anlegg/fartoyvern/ 

 

Om Hardanger fartøyvernsenter 

Hardanger fartøyvernsenter er den største avdelinga i Hardanger og Voss Museum og har kring 45 tilsette. Som nasjonalt fartøyvernsenter har senteret eit av dei største fagmiljøa for restaurering av båtar og fartøy i Norden, med båtbyggjarar, smedar og reipslagarar. I tillegg vert det drive restaurering og dokumentasjon gjennom bygningsverneininga, som også fungerer som læringsarena for studentar frå NTNU og Fagskulen i Vestland.  

Fartoyvern.no