Frå 15. mai til og med 2. september kan du vitja Agatunet som del av opplevinga Aga Cider Tour. Denne turen inkluderar båttur på fjorden med siderbåten Aurora of the Fjords, sidersmaking på Aga sideri, og lunsj og omvising i Agatunet.

Ei flott oppleving!

Turen tingast via heimesida til Dei Historiske – lenkje her.

Les meir om alle tilboda knytt til sidergarder og siderbåt i Hardanger hjå Taste Hardanger – lenkje her.

Kunstnar Janicke Schønning arbeider ute, under open himmel, gjennom alle årstider. Ho har i meir enn ti år utforska korleis vær og natur verker på og saman med tusj og vassfarger på papir og lerret, frå sitt utandørs atelier i Nordmarka utanfor Oslo. Naturkreftene samhandlar med dei ulike materiala, blekk, pigment, og gouache på papir og lerret.

Teikningane og maleria blir til i dialog med elementa, ein prosess der ho berre delvis har kontroll. Sniglar har vandra over arka, regnvatn har dansa med tusjen, lauv har visna over teikningane og sopp har sett avtrykk på lerreta. Lerret og papir har trokke til seg vinterslaps og skiftande halvmørke over fjorden, soge inn skarpt vårlys mellom eldgamle eiketre og vatn ausande ned mellom vindkasta.

I arbeidet med utstillinga har Schønning vitja Hardanger fleire gonger, og overgangen frå den tette granskogen i Nordmarka til bratte bakkar og blåskimrande fjord, har verka inn – både på motiv og fargepalett. Til utstillinga i Kabuso har ho arbeidd med vatn og korleis væska set spor.

Opplev utstillinga i perioden 1. juli til 17. september

>>> Sjå nettsida til kunstnaren

Kammermusikk i Lagmannsstova!

Hardanger Musikkfest sitt stjerneskot 2022, fiolinist Hanna Kallestad tek med seg den prislønna cellisten Birgitta Oftestad til Agatunet, og byr på både eigen musikk og favorittar frå kammermusikkrepertoaret. Sigurd Sverdrup Sandmo er vertskap.

Billettpris: Vaksen 300kr/born 100 kr + billettavgift til Ticketco. Billettar kjøpast her.

Om Hanna Kallestad:

Hausten 2022 tok Hanna Kallestad over rolla som konsertmeister i BFUng. Ho byrja å spela fiolin på Bergen kulturskule då ho var 6 år gamal og i dag studerar ho på Norges musikkhøgskole med Henning Kraggerud. Hanna Kallestad har spelt i Bergen Filharmoniske Ungdomsorkester heilt sidan oppstarten i 2015, og saman med gode vener i orkesteret har ho utvikla ein endå større lidenskap for musikk. I tillegg til BFUng har Kallestad blant anna spelt med Ung Filharmoni, Det Norske Kammerorkester, 1B1 og Bergen Unge Kammerorkester. Som solist har ho fått fleire oppdrag på Edvard Grieg Museum Troldhaugen og Ole Bull Lysøen Museum saman med Ole Christian Haagenrud. Hanne Kallestad vart Hardanger Musikkfest sitt Stjerneskot i 2022 og gjestar festivalen for andre gong.

Om Birgitta Oftestad:

Den unge cellisten Birgitta Oftestad studerer for tida ved Norges musikkhøyskole med Torleif Thedéen som hovudlærar. Ho har allereie rokke å vinna heile 18 nasjonale/internasjonale 1. prisar som solist, og i 2021 vart ho yngste vinnar av Oslo Filharmonien sin «Ung Solist konkurranse». I 2018 vann ho NRK sin konkurranse «Virtuos» og dermed også «den norske solistpris». Birgitta Oftestad fekk då representera Noreg i den internasjonale konkurransen «Eurovision Young Musicians» i Edinburgh, der ho kom til finalen. Ho har spelt på ei rekkje festivalar, både som solist og kammermusikar, og i 2019 opna ho Oslo kammermusikkfestival sitt 30-årsjubileum med Bachs cello suite no 4 – 30 år etter Truls Mørk. Ho har hatt eigen recital i Festspillene i Bergen, og vore solist på Frankishe Müsiktage, Alzenau, saman med Diana Adamyan. Arve Tellefsen har omtala ho som eit av dei største talenta han har høyrt. Birgitta Oftestad gjestar Hardanger Musikkfest for fyrste gong.

Båttransport frå Lofthus
Frå Lofthus kan ein ta siderbåten til Aga kl. 11.15, ankomst 11:30.
Vandring opp til Agatunet. Retur med siderbåten kl. 14.10. Ankomst Lofthus 14.25.
Eigen billett til båten kjøpes her. Pris kr 150 t/r Lofthus-Aga.

Storeteigen tek del i kulturminnedagane 2023 og held stovene opne for publikum.
Me viser også film i stabburet: Tre korte filmar (maks 11 min. kvar) om stølsdrift i Kvam.
Filmane er laga på inititatv av Storeteigen og du kan sjå dei i heile opningstida.

>> Les meir om Kulturminnedagane

 

Gratis inngang

Bli med på feiring av fargerikt fellesskap i Kvam!
Bygdapride 2023 byr på ei rekkje arrangement i Øystese og Norheimsund 4.-9. september.
Som tidlegare vil det også vera aktivitet i og kring Kabuso desse dagane. Kom gjerne innom oss fredag 8. og laurdag 9. september for god input og herleg feiring!

Alle arrangement er gratis

Arr: Fargerikt Kvam

Sundag 10. september vert det Open dag på Oppheim gamle prestegard. Me opnar dørene til alle husa i det autentiske tunet: det vert lansering av hefte om prestegarden, omvisingar i husa, musikk og kaffi, saft og lappar. Gratis inngang!

Program

11-12 Friluftsgudsteneste v/ prostiprest Arnulf Sandvik

kl 12 – 13 Musikk v/folkemusikar Ellen Marie Selland og born frå Vossestrand barne – og ungdomskor. Lansering av hefte om Oppheim gamle prestegard av og med Brita Tveite. Tveite var tidlegare tilsett som undervisningsleiar ved Voss folkemuseum.

12-15 Omvisingar i husa. I kvart av husa er det omvisarar som kan fortelja meir om det enkelte huset og om tunet.

Kafe med kaffi lappar og saft. Gratis inngang, hjarteleg velkomen!

Ruslar du opp vegen frå Oppheim, forbi den gamle kyrkjegarden, kjem du til eit tun med spor etter byggjeskikk og bustadform frå mellomalderen. Bustadhusa ligg i ei lang, samanhengande rekkje, med skykkje/vedhus, årestove, stove, og bu med loft. På veggen mellom stovene finn ein spor av den eldre dekorforma kroting. Fremst i tunet står løa med fjøs.

Arrangementet er ein del av Kulturminnedagane 2023.

Sy hardangersaum til forkle, skjorte og duk

Hardanger folkemuseum og Folgefonn husflidslag inviterer til helgekurs i hardangersaum hausten 2023 med Agnete Sivertsen som kurslærar. Kurset vert fredag 15. – sundag 17. september, kl 09.30 – 17 alle dagar. Kurset inkluderer både omvising, individuell rettleiing og besøk på tekstilmagasinet, samt lunsj og kaffimat i tre dagar.

Like tilbake til 1600-talet har kvinner i Hardanger sydd hardangersaum som ein del av den lokale draktskikken. Sidan har interessa for dette vakre broderiet spreidd seg til store delar av verda. På hardangersaumkurs får du læra dei grunnleggjande teknikkane, dei lure løysingane og dei lokale variantane. Etter ein god introduksjon vel du sjølv om du vil starta på kvitsaum til bunad, forklebord, eller kanskje ein duk eller løpar. Kursa passar både for dei heilt ferske og dei meir erfarne.

Tidspunkt og påmelding

Kurset går fredag 15. – sundag 17. september på Hardanger folkemuseum, kl 09.30 – 17 kvar dag.

Påmelding innan 1. september 2023 til post@hvm.museum.no /tlf 474 79 884

Andre tidspunkt kan og avtalast, me arrangerer kurs for grupper heile året.

Ved færre enn 4 påmeldte deltakarar kan kurset verta avlyst.

Prisar

4200,- pr kurs for medlemmar i Folgefonn/Norges husflidslag.

4700,- pr kurs for ikkje-medlemmar

Kurset inkluderer kaffi, kaker og varm lunsj alle dagar.

Kursmateriell kjem i tillegg, alt etter kva ein vel å sy.

Overnatting

Museet har avtale med Utne hotell, som ligg rett ved museet. Deltakarar på kursa får 10% rabatt på overnatting her. Ta gjerne direkte kontakt med hotellet på reception@utnehotel.no og skriv at du skal på kurs. Overnattinga på hotellet inkluderer frukost og femrettars middag. Sjå også utnehotel.no

Det er og råd å finna overnatting gjennom t.d. Airbnb.

For spørsmål og meir informasjon, kontakt Agnete Sivertsen, tlf 95 93 46 98, agnete.sivertsen@hvm.museum.no

Andre kurs finn du her

Hald av 16. september for dobbelkonsert i Kabuso: Marthe Lea band + Ayumi Tanaka trio.
Dobbelt so god oppleving!

PROGRAM
Kl 17: Huset opnar (igjen)
Kl 18: Marthe Lea band
Kl 19: Ayumi Tanaka trio

Marthe Lea Band er:
Marthe Lea – saksofon, fløyte, piano, gitar, vokal
Andreas Hoem Røysum – klarinettar
Hans P. Kjorstad – fele, fløyte
Egil Kalman – kontrabass, modulærsynth
Hans Hulbækmo – trommer

Ayumi Tanaka trio er:
Ayumi Tanaka – piano
Christian Meaas Svendsen – bass
Per Oddvar Johansen – trommer

Press Images

Denne helga står i musikken og Hardanger Skyspace sitt teikn, med albumlansering i Kabuso og framføring av Kristin Bolstad sitt verk Kveld i sjølve lysverket fredag 22. september.
(og ja, det er også mogleg å bli med på ein Drink & Draw kl 19 denne kvelden). Laurdag 23. september vert det også høve til å oppleva verket Morgon same stad.

PROGRAM
Fredag 22. sept:
Kl 18, Kabuso kafé: Lansering av albumet Morgon og Kveld (gratis inngang)
Kl 19.30: Frammøte i Hardanger Skyspace for verket Kveld
Kl 19.41: Konsertstart. Varigheit: 45 min.
Laurdag 23. sept:
Kl 06.30: Frammøte for konserten Morgon
Kl 06.34: Konsertstart. Varigheit 41 min.

>>> Kjøp billett til Kveld
>>> Kjøp billett til Morgon