Kva skjer ved Hardanger og Voss museum?

I denne verkstaden skal me måla på papptallerkar og gjera dei om til dyr og dyrefjes. Lag di eiga dyremaske. Kanskje skal den vera skummel eller søt. Du bestemmer. I filmkroken får de høyra og sjå eventyr fortald av Odd Børretzen. Drop innom mellom 12 og 14 for ei hyggeleg stund i Kabuso.

Bornas Kabuso: kunst- og filmklubb er eit månadleg tilbod til born i Kabuso. Medlemsskap i klubben kostar 70 kroner per barn og gir gratis inngang til alle arrangementa våren 2019. Vaksne går gratis i følge med born. Inga aldersgrense, inga påmelding. Passar for alle.

2019 Bornas Kabuso plakat

Universet er uendeleg stort og uendeleg lite. I begge retningar rører det seg langt forbi erfaringshorisonten vår. I takt med fotografiet si framgang har og forholdet vårt til universet endra seg. Dette er blant tinga Kirsti van Hoegee undersøkjer, og ho tek i bruk skannar, mobiltelefon og teleskop for å konstruere bilete som gir assosiasjonar til vitskaplege framstillingar av stjernetåke og asteroidar.

Kirsti van Hoegee er utdanna ved Kunstakademiet i Bergen (KMD) og UiB. Ho har hatt separatutstillingar ved Hi10 i Skien, Archipelago (Hordaland Kunstsenter), Haugesund billedgalleri og på House of Foundation i Moss. Vinteren 2017 ga ho ut fotoboka «Planetarisk tåke» på Forlaget HOF. Verka hennar er innkjøpt av Voss kunstlag og Haugesund billedgalleri.

Aud Bækkelund viser hovudsakleg installasjonar i denne utstillinga i Kabuso.
Bækkelund ser etter poesien i omgjevnadane og og i det daglegdagse. Gjennom gjenbruk og ready mades held ho seg i ei materiell assosiasjonsverd knytt til kvardagsliv, sansing og minner.

Bækkelund er fødd og oppvaksen i Hedmark, men flytta til Norheimsund etter å ha fullført hovudfag ved Kunsthøgskolen i Bergen.
Ho har ein omfattande utstillingsaktivitet og har hatt separatutstillingar i Kunstnerforbundet, Ram galleri og Soft galleri i Oslo. Vidare har Bækkelund stilt ut på galleri i Stavanger, Trondheim og Bergen. Ho har også delteke på Høstutstillingen og i ei rekkje gruppeutstillingar i inn- og utland.

Opningstider i utstillingsperioden:
Ons-fre kl 11-15, laur+sun kl 11-16

Sundag 3. mars kl 18.30 held Susanne Lundeng Trio konsert på Hardanger folkemuseum.

Susanne er felespelar, folkemusikar og komponist, og reknast som ein av dei viktigaste tradisjonsberarane frå Nord-Noreg. Med si frisinna og ukonvensjonelle blanding av tradisjonell folkemusikk og moderne samtidsuttrykk, skapar ho med fela sin, ein heilt eigen, personleg og karakteristisk sound. Susanne Lundeng trio består av Susanne Lundeng – fele og vokal, Nils-Olav Johansen – gitar og vokal, Erik Nylander – trommer.

Musikken er prega av den nordnorske naturen og kulturen ho har vakse opp med, men og av ein kunstnarisk vilje og særeiga skaparkraft.

Billettar: 300,- Med sesongkort får du billettar til redusert pris: 270,-

Konsertane på Hardanger folkemuseum vert arrangert i samarbeid med Hardanger folkemusikksamling og med støtte frå Norsk kulturråd.

Høyrt om gratistorsdag i Kabuso? Kvar første torsdag i månaden kan du oppleva utstillingane på utan å tenkja på inngangsbillett.

Aktuelle utstillingar for gratistorsdagane 7. mars og 4. april:
Aud Bækkelund (hovudutstilling)
Kirsti van Hoegee (foajéutstilling)
Hardanger Skyspace (utan lysprogram – eigne tider/billett for dette)
Ingebrigt Vik museum

Lat deg sjarmera av unge talent frå Kvam kulturskule!

Fire gongar i året byr kulturskulen inn til konsert i konsertsalen i Kabuso.
Då kan du lena deg tilbake og oppleva alt frå vakker song til den råaste gitarsoloen. Du vil garantert bli både imponert, rørt og sjarmert – kakaokonsertane byr alltid på gode overraskingar.

Før og etter konserten kan du gjerne nyta kafélivet hos oss – sjølvsagt med mellom anna varm kakao på menyen.

Billettar, i resepsjon: 50,- (born/vaksen)
NB! Kabusokortet gjeld ikkje på kakaokonsertar

Arr: Kvam kulturskule og Kabuso

Spektakulær teiknefilmeventyr med trollmenn, krig og kjærleik. Om den unge jenta Sophie, som vert forheksa til ei gamal dame og virvlast inn i eit eventyr med ein ung, kjekk trollmann, ei tjukk hekst, ein elddemon, ein kortpusta hund – og ikkje minst; eit omstreifande, levande slott.

Lengd: 2 timar.
Papir og blyantar ligg klare på teiknebordet etter filmen.

Om Bornas Kabuso:
Kunst- og filmklubben er eit månadleg tilbod til born i Kabuso.
Medlemsskap i klubben kostar 70 kroner per barn og gir gratis inngang til alle arrangementa våren 2019.
Vaksne går gratis i følge med born. Inga aldersgrense, inga påmelding. Passar for alle.

2019 Bornas Kabuso plakat

Sjonaleistar er ankelsokkar som høyrer til draktskikken i Hardanger og på Voss. Dei vart nytta både av kvinner, menn og born. Kring ankelen har dei ein fleirfarga mønsterbord strikka i tveband, medan resten av sokken er kvit. No kan du koma på kurs å læra å strikke desse vakre sokkane.

I 1927 kom målaren og felespelaren Lars Osa til Aga på eit utsmykkingsoppdrag for det nybygga grendahuset Sagatun. Under opphaldet, og når han kom attende til Aga tidleg på 30-talet, måla han og både portrett og landskap på bestilling frå andre agingar. For fyrste gong har ein samla nokre av dei verka Osa skapte på Aga, og me i Agatunet er stolte over å sesongen 2019 kunne visa ein utstilling med Osa sine Agabilete – mange av dei ukjende og aldri før fremsynt. Tre av bileta eies av grandahuset Sagatun, resten er i privat eie.

Utstillinga er samla og kuratert av Kunstgruppa i Agatunet. Du kan lese meir om utstillinga og kunstnaren her.

Gå ikkje glipp av desse fine portretta av tunet og tunfolket!

Meir program kjem.

Siri Berrefjord arbeider med mange ulike kunst- og kulturuttrykk. Ho lager smykke, syr klede og jobber med grafisk design, mellom anna. Ho har vore frilans fotograf i over 20 år. Berrefjord er ein spanande kunstnar som let seg inspirere av gamalt handverk, og dels nyttar moderne material som plast. Til Agatunet har ho med både tekstilar og smykke. Berrefjord har lenge nytta bondekulturen, med sine rike utsmykkingar, som grobunn for sitt eige uttrykk. I bondekulturens finn ho ei rikdom i fargar og detaljar som ho søkjer å fusjonere med nye materialer, for å gje nytt liv til tradisjonelle uttrykk. Ho har hug til å få sjølve tiden til å synast, tida som er nytta i framstillinga av objekta. For kva er eigentleg tid i en slik sammenheng? Eit uttrykk for omsut, for vedvarande merksemd og kjærleik til tinga. Ein omsut som gjer tinga eksklusivitet, heilt uavhengig av kva materiale dei er framstilla av.

Du kan lesa meir om smykkekunstnaren: her.

26. mai 1293 vart Bleiediplomet gjort og gjeve i Lagmannsstova i Agatunet. Diplomet er eit staseleg mellomalderbrev og det er den eldste fullstendige skildringa av ein rettavgjerdsle me har i Noreg. Lagmann Sigurd Brynjulvsson og tre vitne signerer eit forlik mellom bøder på Indre og Ytre Bleie, i ein tvist som handla om mellom anna beiterett, gjerdehald og fordeling av legd. Mange namn på både personar og garder vert nemnde i brevet, som seier oss mykje om gardsdrift, konfliktomåde og livet i høgmellomalderen.

26. mai 2019 tek professor i rettshistorie oss med på ei vandring på Bleie, med utgangspunkt i Bleiediplomet.

Meir info kjem.

JENTETOKT
Norheimsund – Haugesund 22.-26. juli 2019
Denne veka seglar Mathilde med kvinneleg mannskap, og berre jenter slepp om bord som medseglarar. Som alltid på jentetokt vert det spanande hamner, song, latter og god mat. Skipper Cecilie er klar – og gler seg til å møta ’gamle’ og nye jenter. Ho meiner at jentetokta er såpass helsebringande at ein burde få dei på blå resept.
Dette er eit tokt der alt ligg til rette for flotte naturopplevingar. Me seglar frå Norheimsund måndag, og undervegs gjer me spanande strandhogg, før me endar opp i Haugesund fredag. Velkomen skal du væra – om du er ‘førstereis’ eller erfaren ‘havfrue!’

Påmelding til;
mathilde@hvm.museum.no
Hugs namn, adresse, tlf nr.
Depositum kr. 1000,-
Ta gjerne kontakt for meir informasjon på e-post eller tlf.

NOK 7700,-
Inkluderer:
• Seglopplevingar
• Overnatting på Mathilde
• 3 måltid per dag

KYSTSAFARI 5.-9. august Haugesund – Rosendal
Seglas som høver for store og små, landkrabbar og sjøulkar!
Årets kystsafari går langs vestlandskysten frå Haugesund og inn Hardangerfjorden til vakre Rosendal. Dagane ombord vil vera rike på opplevingar. Aktivitetsnivået avgjer kvar og ein sjølv. Den som ønskjer det, kan delta aktivt i seglinga under kyndig rettleiing av mannskapet, få kjenna sjøspruten i andletet og få opp pulsen ved å klatra i riggen. Vil ein slappa av, kan ein sitja på dekk og lesa ei bok, eller berre nyta det å gli gjennom ukjend farvatn og gje seg hen til bøljeskvulp og måkeskrik.

Totalpris: NOK 7700,- (Born fødd 2003 eller seinare: NOK 5700,-)
Påmelding: Send e-post med namn, adresse og tlf.nr. til
mathilde@hvm.museum.no

Ta gjerne kontakt for meir informasjon:
mathilde@hvm.museum.no
Hege – tlf: 414 87 528